የውርስና ቅርስ ማህበረሰብ የአል ነጃሲ መስጊድ በጦርነት አደጋ በመጎዳቱ ስለተሰማው ሀዘን መግለጫ ሰጠ አወጣ

 

ETHIOPIAN HERITAGE SOCIETY IN NORTH AMERICA
የኢትዮጵያ ውርስና ቅርስ ማኅበር በሰሜን አሜሪካ
703-718-6809
president@ehsna.org
Secretary@ehsna.org
pr@ehsna.org
1317 Orren Street NE, Washington DC 2002

ጥር 7 ቀን 2013 ዓ.ም. (ጃንዋሪ 15, 2021)

በአል ነጃሲ መስጊድ ላይ ስለደረሰው ጥቃት የተሰጠ መግለጫ

የኢትዮጵያ ውርስና ቅርስ ማኅበር በሰሜን አሜሪካ (ኢ.ው.ቅ.ማ.ሰ.አ.) ጥር 2003 ዓ.ም. ከተቋቋመበት ጊዜ ጀምሮ የቀደሙ አባቶቻችንና እናቶቻችን ያወረሱንን ታሪክ፣ ትውፊትና ቅርስ ከትውልድ ወደ ትውልድ እንዲተላለፍና ተተኪው ትውልድ በአገራችን ባሕልና ወግ እንዲታነጽ በማድረግ በኩል ከፍተኛ ጥረት በማድረግ ላይ ይገኛል። ኢትዮጵያ ሉዓላዊነቷና አንድነቷ የተጠበቀ አንዲሁም ዜጎቿ በሰላም የሚኖሩባት አገር እንድትሆን የኢ.ው.ቅ.ማ.ሰ.አ. ጽኑ ምኞት አለው።
የኢትዮጵያ ውርስና ቅርስ ማኅበር በሰሜን አማሪካ በአል ነጃሲ መስጊድ ላይ በደረሰው ጥቃት በእጅጉ ማዘኑን ይገልጻል። የአል ነጃሲ መስጊድ ኢትዮጵያ ውስጥም ሆነ በዓለም አቀፍ ደረጃ ክርስትናን ከእስልምና ጋር ያስተሳሰረ ታሪካዊ መስጊድ ነው። ይህ ጥንታዊ መስጊድ ሁሉም ኢትዮጵያውያን የሚኮሩበት ቅርሳቸውና ታሪካቸው ከመሆኑም በላይ ለጎብኝዎችም መስህብ ነው።
የኢትዮጵያ ውርስና ቅርስ ማኅበር በሰሜን አሜሪካ በታሪካዊ ቤተ እምነቶች፣ሀወልቶች፣ቅርሶችና የተለያዩ አገር ንብረቶች ላይ ለጠባብ ፖለቲካ ዓላማ ማስፈጸሚያ በተለያዩ ቡድኖችና አካላት የሚደርሰውን ጥቃት በጥብቅ ያወግዛል። ኢትዮጵያዊያን የመረጡትን ኃይማኖታቸውን በግላቸው ይዘው እርስ በርስ ተከባብረው፣ተጋብተው፣ ተጎራብተውና ተፋቅረው ለዘመናት ኖረዋል፣ አሁንም እየኖሩ ነው ለወደፊቱም ይኖራሉ።
በአል ነጃሲ መስጊድና በሌሎችም ኃይማኖታዊና ታሪካዊ ቦታዎች ላይ ጥቃት፣ውድመትና ቃጠሎ ያደረሱ ግለሰቦችም ሆነ ቡድኖች ማንነታቸው ተጣርቶ በአስቸኳይ ለፍርድ እንዲቀርቡ ማህበራችን ይጠይቃል። ለአገር ቅርሶችና ቤተ እምነቶች ጥበቃ ማድረግና ደህነነታቸውን ማረጋገጥ የመንግስት ግዴታና ኃላፊነት መሆኑን ለማስገንዘብ እንወዳለን። ካለፉት ሶስት አመታት አንስቶ የምዕመናን መጨፍጨፍና መፈናቀል እንዲሁም የቤተክርስቲያኖችና መስጊዶች ቃጠሎ፣ ውድመትና ዝርፊያ ላይ መንግስት ያሳውየን ቸልተኝነት ግዴለሽነት በጥብቅ እናወግዛለን። ህዝብ እንደ ቅጠል ሲረግፍ፣ ሲጨፈጨፍና ሲታረድ መንግስት ምንም አይነት እርምጃ አለመውሰዱ አንዳንድ ወገኖች “የመንግስትም እጅ አለበት” እስከማለት ደርሰዋል። ስለሆነም መንግስት ሰንካላ ምክንያቶችን መደርደሩን አቁሞ የዜጎችን ደህንነትና ሰላም የማስጠበቅ ኃላፊነቱን እንዲወጣ አበክረን እንጠይቃለን።
አል ነጃሺ መስጊድ በአስቸኳይ ታድሶ እንደ በፊቱ አገልግሎቱን እንዲቀጥል መንግስት በአስቸኳይ እርምጃ እንዲወስድ በጥብቅ እንጠይቃለን። እያንዳንዱም ዜጋ ለቅርሶችና ቤተ እምነቶች መጠበቅ የበኩሉን አስተዋጽኦ ማድረግ እንደሚገባውም እናሳስባለን።የኢትዮጵያ ውርስና ቅርስ ማኅበር በሰሜን አማሪካን ለመስጊዱ እድሳት አቅማችን በሚፈቀደው መንገድ ለመተባበር ዝግጁ መሆናችንንም ለማሳወቅ እንወዳለን።

ኢትዮጵያ በአንድነቷና በሉዓላዊነቷ ጸንታ ለዘላለም ትኑር!
የኢትዮጵያ ውርስና ቅርስ ማኅበር በሰሜን አማሪካ

የኢትዮጵያ ውርስና ቅርስ ማሕበረሰብ ቦርድ የብፁዕ አቡነ መልከጻዲቅን ዜና እረፍት በማውሳት ሀዘኑን ገለጸ

የኢትዮጵያ ውርስና ቅርስ ማሕበረሰብ ቦርድ ታሕሳስ ሶስት ቀን ባደረገው ልዩ ስብሰባ ስለ መቶ ሃያ አምስተኛው የአድዋ ድል መታሰቢያ ተጋባዦች ዝርዝር ከተነጋገረ በሁዋላ፤ በቪድዮ አስተያየት ስለሚያቀርቡት የተለያዩ የህብረተሰብ ወገኖች የወጣውን እቅድ አጽድቆ ለእለቱን የተያዘውን የስብሰባ አጅንዳ ጨርሱዋል። ከዚህም በማስከተል ስለብፁዕ አቡነ መልከጻዲቅ እረፍት በስብሰባው ላይ በማውሳት ቦርዱ የተሰማውን ሀዘን በውይይት ገልጹዋል። እንደሚታወቀው በተከታታይ ሶስት ታላላቅ ሰዎች፤ አቶ ለማጉያና ፕሮፌሰር መስፍንን ጨምሮ ከሕብረተሰቡ መለየታቸው ሀዘኑ ለጎዳችው ወገኖቻችን በሙሉ መጽናናትን እየተመኘን ስለ ብፁእነታችው የህይወት ታሪክ በወገኖቻቸው የተዘጋጀውን ቪድዮ እንድትመለከቱት ከዚህ ጋራ ከታች አቅርበናል።

ለይኩን ካሣሁን
ሕዝብ ግንኙነት
pr@eshna.org

የመቶ ሃያ አምስተኛው የአድዋ ድል መታሰቢያ ዝግጅት ላይ ልዑል ዶክተር አስፋወሰን አስራተ ካሣ በክብር እንግድነት እንደሚገኙ ተገለጸ

የኢትዮጵያ ውርስና ቅርስ ማህበረሰብ ቦርድ ሕዳር ሃያ ስድስት ቀን ባደረገው ስብሰባ ለመቶ ሃያ አምስተኛው የአድዋ ድል መታሰቢያ ልዑል ዶክተር አስፋወሰን አስራተ ካሣ በክብር እንግድነት እንዲገኙ ውሳኔ በሙሉ ድምጽ ያሳለፈ ከመሆኑም በላይ፤ ክቡርነታችው የአጼ ሚኒሊክ አጎት የስመ ጥሩው የራስ ዳርጌ የልጅ ልጅ በመሆናቸው፤ ለበዓሉ ለመላው አያቶቻችን ለምናደርገው ታላቅ የምስጋናና የክብር ቀን የክቡርነታችው መገኘት በዓሉን ትልቅ ቦታ እንደሚሰጠውም ተወስቱዋል። በማግስቱም ሕዳር ሃያ ሰባት ቀን ልዑል ዶክተር አስፋወሰን በክብር እንግድነት በበዓሉ ላይ እንዲገኙ ተጠይቀው፤ እሳቸውም ጥሪውን ተቀብለው መልካም ፈቃደኛ መሆናቸውን አበክረው ገልጸዋል። ቦርዱ በዓሉ የሚከበረው ማርች ስድስት /የካቲት ሃያ ሰባት/ መሆኑንም በዚሁ እለት ባደረገው ስብሰባ ውስኑዋል፡፡ በዚሁም ስብሰባ ወላጆች ልጆቻችውን የአገር ስሜታችውን እንዲገልጹ በአድዋ ድል ላይ ከሶስት ደቂቃ ያልበለጠ የንግግር ወይም ተውኔታዊ ገለጻ ቪድዮ ቀርጸው በተለያየ መድረክ እንዲልኩልን ለማድረግ ጥረት እየተደረገ መሆኑንም ተወያይተዋል። ወላጆች ለቦርድ አባላት ወይም በኢሜል ለ pr@ehsna.org ወይም ፌስ ቡካችን ላይ facebook.com/ehsna ቢልኩ የምናመሰግን መሆናችንን ከወዲሁ እንገልጻለን።

ለይኩን ካሣሁን
ሕዝብ ግንኙነት

c

የአቶ ለማ ጉያ ዜና እረፍት የውርስና ቅርስ ማህበረሰብ ቦርድ እንዳሳዘነው ገለጸ

የኢትዮጵያ ውርስና ቅርስ ማህበረሰብ በሰሜን አሜሪካ ቦርድ፤ ሕዳር ሰባት ቀን ባደረገው የቦርድ ልዩ ስብሰባ ላይ የአቶ ለማ ጉያን ዜና እረፍት ተወያይቶ በእረፍታቸው ጥልቅ ሀዘን የተሰማው መሆኑን ገልጽዋል። በማስከተልም ለቤተሰቦቻቸው፤ ለዘመድና ወዳጆቻችው ፈጣሪ ለዚህ አሳዛኝ ጊዜ ብርታቱን እንዲሰጣችው ተመኝቱዋል።
ታዋቂ ሥራዎቻችውን ለማስታዎስ ያሀል እነዚህን የመልከቱ፤

የመቶ ሃያ አምስተኛውን (125ኛ) የአድዋ ድል በዓል በተለየ ሁኔታ ለማክበር ዝግጅት ጀምረናል።

የ125ኛው የአድዋ ድል በዓልን እጅግ በደመቀና ባመረ፤ ከበፊቶቹ ዝግጅቶቻችን ሁሉ በላቀ ሁኔታ ለማክበር አቅደን የነበረ ቢሆንም፤ በኮቪድ 19 ወረረሽኝ ምክያት በአዳራሽ ውስጥ ዝግጅቶቻችንን ማካሄድ እንደማይቻል ስለተገለጸልን በእጅጉ አዝነናል። ሆኖም ቴክኖሎጅ በፈቀደው መንገድ በርቀት (virtually) ተሳትፎ ለማካሄድ ዝግጅቶችን ጀምረናል። ስለአከባበራችንና ታዳሚዎች ስለሚሳተፉበት ሁኔታ ዝርዝር መረጃ በዚህ ድረገጻችንና በሌሎች ዜና ማሳራጫዎች ላይ በቅርቡ እናሳውቃለን። ጥያቄ ካላችሁ ለድርጅቱ የህዝብ ግንኙነት ኃላፊ ለሆኑት ለአቶ ለይኩን ካሣሁን በኢሜል PR@EHSNA.Org በስልክ 717፟፟፟-574፟-1183 ወይም ለድርጅቱ ፕሬዝዳንት ለአቶ ተስፋዬ አምበርብር president@EHSNA.org ወይም በስልክ 703-718-6809 ማግኘት ይችላሉ።

ከሰላምታ ጋር

ተስፋዬ አምበርብር
ፕሬዘዳንት

የመቶ ሃያ አምስተኛውን የአድዋ ድል በዓል በተለየ ሁኔታ እንደሚከበር መሀበሩ ዝግጅት ላይ መሆኑ ታወቀ።

የ125ኛዉ የአድዋ ድል በዓል በአማራጭ ዜና ማሰራጫ ሊከበር ነው። ለዚህ ዝግጅት ጽሁፍ አቅራቢዎችን ለመጋበዝ የመሀበሩ ቦርድ አባላት ዝግጅት ላይ መሆናቸውም ይገመታል። ይህ ታላቅ የጥቁር ሕዝቦች ድል በወቅቱ የኮሮና ተስቦ በሽታ ምክንያት እንደታሰበው በከፍተኛ ሁኔታ በምልዓተ ሕዝብ ማክበር ባይቻልም፤ በአማራጭ ዜና አገልግሎት በዓሉን ማክበር አስፈላጊ መሆኑን የመሀበሩ አመራር አባላት እየተነጋገሩበት መሆኑም ታውቁዋል።

በአገራችን በዘርና በሀይማኖት ላይ ያተኮረና የሕዝብ ውርስና ቅርስ ላይ የደረስውን ጥፋት በተመለከተ የተሰጠ መግለጫ

EHSNA press release 9-19-2020

ETHIOPIAN HERITAGE
SOCIETY IN NORTH AMERICA
የኢትዮጵያ ውርስና ቅርስ ማኅበር በሰሜን አሜሪካ
1317 Orren Street NE, Washington, DC 20002
president@ehsna.org
pr@ehsna.org
703-718-6809
መስከረም 9 ቀን 2013 ዓ.ም.
(September 19, 2020)

ጉዳዩ፤ ኢትዮጵያ ውስጥ አየተፈጸመ ስላለው ጀኖሳይድና የንብረት ውድመት አፋጣኝ መፍትሔ እንዲፈለግለት ስለማሳሰብ

የኢትዮጵያ ውርስና ቅርስ ማኅበር በሰሜን አሜሪካ (ኢ.ው.ቅ.ማ.ሰ.አ.) ጥር 2003 ዓ.ም. ከተቋቋመበት ጊዜ ጀምሮ የቀደሙ አባቶቻችንና እናቶቻችን ያወረሱንን ታሪክ፣ ትውፊትና ቅርስ ከትውልድ ወደ ትውልድ እንዲተላለፍና ተተኪው ትውልድ በአገራችን ባሕልና ወግ እንዲታነጽ በማድረግ በኩል ከፍተኛ ጥረት በማድረግ ላይ ይገኛል። ኢትዮጵያ ሉዓላዊነቷና አንድነቷ የተጠበቀ አንዲሁም ዜጎቿ በሰላም የሚኖሩባት አገር እንድትሆን የኢ.ው.ቅ.ማ.ሰ.አ. ጽኑ ምኞት አለው። ድርጅቱ ከኢትዮጵያ አኩሪ ታሪክ ውስጥ ግምባር ቀደም የሆነውን የአድዋ ድል በማስመልከት የታሪክ ምሁራንን፣ ተመራማሪዎችንና ታዋቂ ግለሰቦችን በመጋበዝ ለረዥም ዓመታት ውጤታማ ዝግጅቶችን አካሂዷል። ከዚህም በተጨማሪ በሜሪላንድ ክፍለ ሀገር ውስጥ በሚገኘው የሞንትጎመሪ አውራጃ ውስጥ የአድዋ ድል በአዋጅ እንዲዘክርና እንዲታሰብ አስደርጓል። ድርጅታችን እንደ አንድ ኢትዮጵያዊ ተቋም የህዝብን ሰላምና ደህንነት የሚመለከቱ ጉዳዮችን ይከታተላል። በዚህም መሠረት ካለፉት ሁለት ዓመታት ተኩል አንስቶ በተለየ ሁኔታ በበርካታ የአገሪቷ ክፍሎች ውስጥ እየደረሰ ያለው ማንነትንና ሐይማኖትን መሠረት ያደረገ ጥቃት በእጅጉ አሳዝኖናል አስቆጥቶናልም። የተሳሳተ የፖለቲካ አስተሳሰብ የወለደው የጭካኔ ድርጊት የዜጎች ፍጅትን፣ ንብረት ውድመትን፣ ዘረፋን፣ የአብያተ ክርስትያናትን መቃጠል በማስከተሉ በእጅጉ አሳዝኖናል፣ አስቆጥቶናልም። ክርስቲያንና ሙስሊም ተከባብሮና ተፋቅሮ በሚኖርባት አገር ውስጥ በማናቸውም ቤተ እምነት ላይ የሚደርስ ጥቃት እጅግ ከባድ ወንጀል በመሆኑ በዝምታ መታለፍ እንደሌለበት እናምናለን።

ኢትዮጵያዊያን በፈለጉትና በመረጡት ቦታ የመኖርና የመሥራት ህጋዊ መብታቸው ተጥሶ ለስደተኞች ሊደረግላቸው የሚገባ ሰብዓዊ እንክብካቤ አንኳ ተነፍጓቸው፤ አያት ቅድመ አያቶቻቸው ተወልደው ባደጉበትና እትብታቸው በተቀበረበት ቦታ እጅግ በሚሰቀጥጥ ሁኔታ አማራና የኦርቶዶክስ ተዋሕዶ ቤተክርስቲያን ተከታይ በመሆናቸው ብቻ ተለይተው ሲታረዱና አካላቸው ሲቆራረጥ፣ አይናቸው ተጎልጉሎ ሲወጣ፣ እርጉዝ ሴቶች ማህጸናቸው በጩቤ ተዘርግፎ ጽንሳቸው ሲጨነግፍና አስከሬናቸው ተቆራርጦ ሲጣል ከመመልከት የከፋ መከራ በዚህ ዓለም ላይ ይመጣል ብሎ ማሰብ አይቻልም። ይህ ታይቶም ተሰምቶም የማያውቅ ዘግናኝ ድርጊት አገራችን ውስጥ በመፈዘሙ ከልብ አዝነናል። ይህ ሁሉ ጭፍጨፋና ውድመት ሲካሄድ የመንግሥት አካላት የሆኑት መከላከያ ሠራዊት፣ ፖሊሶችና “ልዩ ኃይሎች” እንዲሁም የአስተዳደር ሠራተኞች፣ እልቂቱን ማስቆምና የዜጎችን ህይወት መታደግ ሲገባቸው የጥፋቱ ተባባሪ ሆነው መገኘታቸውን የሚያሳዩ ማስረጃዎች ተለቀዋል። የአማራ ብሔረሰብ አባላትና የኦርቶዶክስ ተዋሕዶ ክርስትና ተከታዮች ስም ዝርዝርና የሚኖሩበት የቤት ቁጥር ተለይቶ ቤታቸው ውስጥ እያሉ በመንግስት እይታ ሥር እንዲጨፈጨፉ ተደርገዋል። ግድያው የተፈጸመው ቤታቸው ውስጥ መሆኑ ግድያው በዕቅድ የተመራና የአካባቢው ሹመኞች እጅ እንዳለበት የሚያረጋግጥ ነው። በተግባር ከደረሰው አኳያ በጥቂቱ ጠቀስነው እንጅ ዘርና ሐይማኖት ላይ ያተኮረ እጅግ የሚዘገንና የሚሰቀጥጥ የጭካኔና የጥላቻ ድርጊት ተፈጽሟል።

በኢትዮጵያ የወንጀለኞች መቅጫ ሕግና በዓለም ዓቀፍ የሰብዓዊ መብት ጥበቃ ድንጋጌዎች መሠረት እየደረሰ ላላው የዘር ማጥፋት (ጀኖሳይድ) አፋጣኝ መፍትሔ እንዲፈለግለት እንጠይቃለን። መንግሥት ከፈለገ ሮጦ የመድረስ አቅሙ እንደ አውሎ ነፋስ ፈጣን መሆኑን በሶማሌ ክልል፣ በአማራ ክልልና በቅርቡም በዎላይታ ዞን ከተወሰዱት እርምጃዎች ለመረዳት ይቻላል። ሆኖም በቡራዩ፣ በሻሸመኔ፣ ኮፈሌ፣ ዝዋይ፣ በባሌ፣ዶዶላ፣ሀረር፣ድሬዳዋ፣ መተከልና ሌሎችም ቦታዎች ይህ ፍጥነት አለመታየቱ ያሳዝናል። ይዋል ይደር ሊባል የማይገባውና አሁኑኑ ሥራ ላይ መዋል ያለበት ኦሮሚያና ሌሎች ክልሎች ውስጥ በአማራዎችና በኦርቶዶክስ ቤተክርስቲያን ተከታዮች ላይ ጀኖሳይድ የሚፈጽመውን እጅግ አነስተኛ ቁጥር ያለውን ወንጀለኛ የቄሮ መንጋ በቁጥጥር ስር አውሎ ለፍርድ ማቅረብ ነው። የዘር ማጥፋት (ጀኖሳይድ) የማስቆምና ወንጀለኞችን ለፍርድ የማቅረብ እንዲሁም የአገሪቷን ሰላምና ደህንነት የማስጠበቅ ኃላፊነትን መንግሥት በአፋጣኝ እንዲወጣ እያሳሰብን፤ የኢትዮጵያ ውርስና ቅርስ ማህበር እንደ አንድ ተቆርቋሪና ጉዳዩ እንደሚመለከተው ተቋም ከዚህ በታች የሚከተሉትን ማሳሰቢያዎች ያቀርባል፤

1. የወንጀል ድርጊትን መደበቅ የህዝብን አመኔታ ሰለሚያጠፋ ቡራዩ፣ ሻሸመኔ፣ ኮፈሌ፣ ዝዋይ፣ ባሌ፣ዶዶላ፣ ሀረር፣ ድሬዳዋ፣ መተከልና ሌሎችም ቦታዎች ውስጥ የተፈጸመው ተራ ወንጀል ሳይሆን የዘር ማጥፋት (ጀኖሳይድ) ስለሆነ በትክክለኛው የወንጀሉ ስም ጀኖሳይድ ወይም የዘር ማጥፋት ተብሎ አንዲገለጽ እንጠይቃለን።

2. በአገር ውስጥም ሆነ በውጭ አገራት በሚገኙ በዜና ማሰራጫዎችና በማህበራዊ መገናኛዎች ላይ የጥላቻና “የግደለውና የእረደው” አዋጅ አውጀው፣ የጥቂት ወጣቶችን አዕምሮ በጥላቻ መርዘው ጀኖሳይድ ያደረሱ ቡድኖች፣ ግለሰቦች፣ ድጋፍ ሰጪዎችና እንዲሁም ሆን ብለው የጥፋቱን ሀሳብ ያፈለቁና የተባበሯቸው የመንግሥት አካላት ሁሉ ማንነታቸው ተጣርቶ ለፍርድ ማቅረብ የመንግስት ኃላፊነትና የስራ ድርሻ መሆኑን ለማስገንዘብ እንወዳለን።

3. የቤተሰብ አባላት ለተገደሉባቸውና ለተፈናቀሉ ወገኖች እንዲሁም ቤታቸው፣ ሱቃቸው፣ መኪናቸው፣ መጋዘናቸውና ልዩ ልዩ ዓይነት ንብረቶቻቸው ለወደመባቸውና ለተዘረፋባቸው ዜጎች በአስቸኳይ ካሳ የመስጠትና ሕይወታቸው እንደገና እንዲቀጥል የማድረግ ኃላፊነት የመንግሥት መሆኑን ለማስገንዘብ እንወዳለን።

4. በተደራጀ የመንጋ ጥቃት የፈረሱ ሃውልቶች ተመልሰው የነበሩበት ቦታ ላይ እንዲተከሉ አንዲሁም የተቃጠሉና የፈረሱ ቤተክርስቲያኖች፣ መስጊዶችና ሌሎችም የማህበረተሰብ መገልገያዎች ተመልሰው እንዲገነቡ እየጠየቅን በዚህም የመልሶ መገንባት ሥራ ድርጅታችንም ሆነ ሕዝብ ተሳታፊ እንዲሆን እድሉ እንዲመቻች እንጠይቃለን።

5. ቤተክርስቲያኖች፣ መስጊዶች፣ ሀውልቶች፣ ቅርሶችና የተለያዩ የማሕበረሰብ ንብረቶች ላይ ጥቃትና ዝርፊያ እንዳይደርስ መንግሥት ልዩ ጥበቃ እንዲያደርግ እየጠየቅን ሕዝቡም ቅርሶችንና የማሕበረሰብ መገልገያዎን በመጠበቅና በመንከባከብ ረገድ ከመንግሥት ጋር ተባብሮ መስራት እንዳለበት እናሳስባለን። እኛም ለዚህ ተግባር የበኩላችንን አስተዋጽኦ ለማበርከት ዝግጁ መሆናችንን እንገልጻለን።

6. ከሁሉም በላይ ለዚህ ሁሉ ጥፋት ምንጭ የሆነውን የውሽት የታሪክ ትርክትና በቅጥፈት የተበከለ የፖለቲካ መስመርን ማምከን በተመለከተ መንግሥት ሳያሰልስ ለሁሉም ዜጎች የሚሰጥ የሰውን ልጅ ክብርና የአብሮነትን ጥቅም የሚያስገነዝብ አገር አቀፍ ሰፊ የተሀድሶ ዘመቻ እንዲያደረግ አጠንክረን እንጠይቃለን። መሠረተ ቢስ በሆነ የሀሰት የታሪክ አስተሳሰብና የጥላቻ ፍልስፍና ላይ ተመርዞ ያደገ ወጣት ከማጥፋት አይድንምና አስተሳሰቡን ለማስተካከል መንግስትና ሁሉም የሕብረተሰብ ክፍል የሥራ ድርሻና ኃላፊነት መሆኑን እየጠቆምን እኛም አቅማችን በሚፈቅደው መጠን ለመተባበር ዝግጁ መሆናችንን አንገልጻለን።
እግዚአብሔር ኢትዮጵያንና ሕዝቧን ይጠብቅ!
የኢትዮጵያ ውርስና ቅርስ ማሕበር በሰሜን አሜሪካ

ግልባጭ፣
ለኢትዮጵያ ጠቅላይ ሚኒስትር ጽ/ቤት
ለኢትዮጵያ ሰብዓዊ መብት ኮሚሽን
ለኢትዮጵያ ኦርቶዶክስ ተዋሕዶ ቤተክርስቲያን መንበረ ፓትርያርክ ጽ/ቤት
ለኢትዮጵያ እስልምና ጉዳዮች ጠቅላይ ምክር ቤት
ለኢትዮጵያ ባሕል ሚኒስቴር
ለኢትዮጵያ ሰብዓዊ መብት ጉባዔ
ለአሜሪካ የውጭ ጉዳይ ሚኒስቴር (ስቴት ዲፓርትመንት)
አፍሪካ ዋች
ጀኖሳይድ ዋች
የአውሮፓ ኮሚሽን
ኢንተርናሽናል ክራይሲስ ግሩፕ
ለአምነሲት ኢንተርናሽናል
ለዓለም አብያተ ክርስቲያናት ጉባኤ (WCC)
ለተባበሩት መንግሥታት ድርጅት የሰብዓዊ መብት ኮሚሽን
ለኢትዮጵያ ኤምባሲ፣ ዋሽንግተን ዲሲ

የ124ኛዉ የአድዋ ድል በዓል በደማቅ ሁኔታ ሊከበር  ነው። -EHSNA

የኢትዮጵያውያን ውርስና ቅርስ ማህበረሰብ በሰሜን አሜሪካ

የ124ኛዉ የአድዋ ድል በዓል በደማቅ ሁኔታ ለማክበር ዝግጅቱን በማጠናቀቅ ላይ መሆኑን ሲያበስር በደስታ ነዉ:: (The 124th Victory of the Battle of Adwa Celebration in Silver Spring)

እጅግ ታላቅና አኩሪ የሆነው የአድዋ ድል በዓላችን በኢትዮጵያውያን ዉርስና ቅርስ ማህበረሰብ በዲስ አካባቢ ሲከበር ለዘጠነኛ ጊዜ ሲሆን በዕለቱ የሚደረግገ ው የአድዋ ድል በዓል በዲሲ ዙሪያ በሚኖሩ የኢትዮጵያውያንና ሌሎች የማህበረሰብ አባላት ፤ የሞንትጎመሪ ካዉንስል አመራሮች ፤ ታዋቂ የክብር እንግዶች በሚገኙበት በንግግር ፤ በስነ ግጥም ፤ በአጭር ተዉኔት  የመሳሰሉትን አዝናኝና አስተማሪ ፕሮግራሞችን በማቅረብ በደማቅ ሁኔታ ይከበራል::

በተለይም በዚህ ዓመት ታዋቂዉ የታሪክ መምህርና ፀሐፊ የሆኑትን አቶ ታዬ ቦጋለ አረጋ ከኢትዮጵያ በመጋበዝ የአድዋ ድል በጥልቀት የሚዳስስ ንግግር ያቀርባሉ። ከዚህም በተጨማሪ ታዋቂዉ የጣይቱ ማዕከል ጋር በመተባበር የዳግማዊ አፄ ምኒልክንና የእቴጌ ጣይቱን  የጦርነቱን የአመራር ስልት የሚያሳይ አጭር ተውኔት ስለሚቀርብ በመዝናናት ታሪክዎን ያድሳሉ ::

ዝግጅቱ የሚደረገው ዳዉንታውን በሚገኘው የሲልቨር ስፕሪንግ የሲቪክ ማዕከል (1 Veterans Place, Silver Spring, MD, 20910) ቅዳሜ፣ የካቲት ፳፩ ቀን ፳፻፲፪ ዓ.ም. (Saturday, February 29, 2020)  ከቀትር 1:00 አንስቶ እስከ 6:00 ፒ. ኤም ባለው ጊዜ ውስጥ ሲሆን የበለጠ መረጃ ለማግኘት በኢሜይል info@ehsna.org  ወይም በስልክ  ቁጥር 615-412-9094 መጠቀም  የሚችሉ ሲሆን በዚሁ ዝግጅት ላይ በመገኘት ታሪክዎንና ባህልዎን እንዲያከብሩ የኢትዮጵያውያን ውርስና ቅርስ ማህበረሰብ ከውዲሁ በአክብሮት ጋብዝዎታል።

 

ኢትዮጵያ ለዘላለም ትኑር!

 

https://youtu.be/oTcRJC8WFu0?t=77